Minniháttar bilun

Partalistinn lá niðri í nokkurn tíma, vegna þess að diskur fylltist. Undirritaður var á ferðalagi og tók því lengur en ella að taka eftir og kippa hlutunum í lag.

Ég biðst afsökunar á ónæðinu, mér sýnist hlutir eiga að vera komnir í gang aftur núna.

Endilega hikið ekki við að senda mér tölvupóst ef Partalistinn er bilaður, flýtir oft fyrir lagfæringum.

Boð og bönn og ritstjórn

Fyrir nokkru bætti ég hljóðlega við þeim fítus að geta bannað notendum Partalistans að birta nýjar auglýsingar.

Enn sem komið er hefur þetta eingöngu verið notað til að banna þá sem reyna að auglýsa "multilevel-marketing" svikamyllur af ýmsum toga, hvort sem um er að ræða fæðubótarefni eða "get-rich-quick" kjaftæði.

Ef þú telur þig hafa verið ranglega bannaðan, þá er sjálfsagt mál að hafa samband og rökstyðja þitt mál. Hinsvegar áskil ég mér rétt til að beita þeirri ritstjórnarstefnu sem ég tel koma almennum notendum Partalistans best, þó það kunni að koma stökum auglýsendum illa.

Ég vil annars hvetja innskráða fastagesti Partalistans til að kíkja af og til í "Nýjasta nýtt" flokkinn og hjálpa mér að halda listanum góðum með því að tilkynna misnotkun þegar þið sjáið hana.

Ef menn hafa einhverjar spurningar eða tillögur, þá er líklega viðeigandi að nota comment-hala þessarar færslu til að ræða málin. Látið endilega heyra í ykkur.

Slökkt óvart á póstsendingum

Um nokkurt skeið núna hefur verið slökkt á póstsendingum Partalistans til þeirra sem vakta auglýsingar og vilja fá þær sendar jafnóðum.

Skýringin var mannleg mistök. Það sem mér sýnist hafa gerst er að þegar ég var síðast að vinna í kerfi Partalistans hef ég óvart eytt einni línu of mikið úr "crontab" skránni sem ræður hvenær lotubundin verk (þ.m.t. póstsendingar) eru framkvæmdar.

Ég hef nú (vonandi!) kippt þessu í lag.

Ég vil þakka kærlega þeim sem þrjóskuðust við að senda mér ítrekuð bréf um að þetta væri bilað. Ég hefði líklega mátt bregðast aðeins fyrr við þeim ábendingum. :-)

Skipt um gagnagrunn, afkastamælingar

Nú um helgina var skipt um gagnagrunn bak við leitarvél Partalistans. Engar breytingar urðu á virkni kerfisins, en markmiðið var að minnka minnisnotkun og undirbúa örari uppfærslur á innihaldi vélarinnar.

Í beinu framhaldi framkvæmdi ég afkastamælingar til að meta afköst Partalistans undir álagi. Svo virðist að kerfið geti svarað að um það bil 90 fyrirspurnum á sekúndu!

Ég held það sé bara nokkuð gott fyrir kerfi sem er alfarið skrifað í Perl... :-)

Leitarvélin lagfærð

Minniháttar bilun í leitarvélinni olli því um nokkurt skeið að engar auglýsingar á Partalistanum sjálfum fundust þegar leitað var, einungis auglýsingar á öðrum síðum.

Þetta hefur nú verið lagað, afsakið klúðrið!

Nýr gagnagrunnur, blogg og enska

Í dag var kerfi Partalistans uppfært. Stærsta breytingin var að taka í notkun nýjan gagnagrunn fyrir smáauglýsingarnar. Uppfærslan gekk, eftir því sem ég best veit, vandræðalaust fyrir sig og tók innan við hálftíma.

Notendur Partalistans munu líklega ekki sjá mikinn mun, nema hvað vefurinn ætti að vera aðeins hraðvirkari en hann var.

Einnig er kominn vísir að (ókláraðri) enskri þýðingu vefsins og ýmislegt annað smálegt breyttist.

Og þetta blogg, það er víst nýtt líka. :-)

Eldri fréttir

2008-05-16
Það virðast vera einhver vandræðu með póstsendingar; sumar auglýsingar eru sendar út í tví- eða jafnvelþríriti til áskrifenda. Verið er að kanna hvað veldur, vonandi kemst þetta í lag nú um helgina.

2008-04-13
Leitarvélin er loks flutt á sama stað og restin af Partalistanum - og hún virkar!

2008-04-06
Loksins eru komnir "áfram" og "aftur" takkar á flokkayfirlit sem innihalda fleiri auglýsingar en ég birti í einu. Þetta hafði bara gleymst!
Einnig hafa RSS yfirlitin verið stórbætt svo nú er hægt að sjá myndir og svara auglýsendum beint úr flestum betri RSS lesurum.

2008-04-01
Enn fleiri gröf: nú geta auglýsendur séð gröf yfir hversu oft auglýsingar þeirra eru skoðaðar. Gröfin birtast í hægri kant auglýsinganna. Auglýsendur þurfa að vera skráðir inn til að sjá þessi gröf.
Einnig er búið að laga allmarga hnökra sem voru á vefnum í IE7 vafranum.

2008-03-31
Nú má sjá innri tölfræði Partalistans, með fallegum gröfum og alles. Sum gröfin eru að vísu enn mjög óspennandi því ég er nýbyrjaður að mæla viðkomandi hluti. En það lagast með tímanum.

2008-01-28
Búið er að virkja gzip þjöppun og aðra "hreinsun" á því efni sem Partalistinn sendir frá sér. Upp komu nokkur minniháttar klúður með þeim afleiðingum að nokkur bréf (tölvupóstur) fóru ekki rétt frá kerfinu. Úbs! Það er vonandi allt komið í lag núna.
Þessar breytingar miða að því að gera vefinn örlítið hraðari og léttari, en markmiðið þar er að geta boðið upp á útgáfu af Partalistanum sem er þægileg á farsíma. Ef einhverjir vilja prófa það sem komið er, þá er vísir að "farsímaútgáfu" að smella saman hér: m.partalistinn.net.
Endilega látið vita hvað ykkur finnst.

2008-01-13
Áskrift allra sem voru á gamla póstlistanum var í dag flutt yfir í nýja kerfið.
Einnig er búið er að finna og laga allskyns smáhnökra. Þar ber líklega helst að nefna að myndir í auglýsingum virka aftur núna.

2008-01-02
Gleðilegt ár!
Öllum að óvörum hefur Partalistinn nú verið endurskrifaður nánast frá grunni. Ýmislegt hefur breyst og fleira mun breytast á næstu dögum. Endilega látið heyra í ykkur ef eitthvað virkar ekki sem skyldi.